Kī mai ai taku koroua ki a au. ‘I ia tutukinga kaupapa, ka nui noa ake ngā hiahia o te iwi kia pērā atu anō.’ Koia nei te āhuatanga ki a Raukawa. I roto tonu i ngā whakaritenga whakatau kerēme, i kitea, ā, i whakaritea hoki tētehi tukanga tautoko hei āwhina i ngā uri me ō rātou mōhiotanga, mōhiotanga kore rānei mō ngā whiriwhiringa e pā ana ki tā mātou whakataunga kerēme. Ka rua, ko taua tukanga tautoko i āwhina hoki i te hapori whānui i a rātou anō ngā whakaaro rerekē ki tā mātou whakataunga kerēme.
I mua i te whakawhiwhinga i ngā rawa me ngā whakatikahanga i ahu mai ai i te whakataunga, he pāpaku noa te tīma Tiriti o Raukawa. Engari i te rukuhanga hōhonu ki ngā rangahau i te hītōria o te iwi, rere ai te karanga ki tō mātou iwi hei āwhina mai ki te whakatupu i tō mātou āheinga, ā, i tino pai te whakahoki. Ko tōna 70 tāngata o ngā whānau i tae mai hei tūao ki te āwhina i te kaupapa tauwhaituhi o Te Kōti Whenua Taketake. Arā te kōrero ‘ahakoa he iti, he pounamu.’ Ahakoa nui, iti rānei tā rātou āwhinatanga ki te kaupapa, he āwhinatanga tērā i kōkiri tonu i te kaupapa ki tōna tutukihanga me ōna putanga whaihua. Ko ētehi o ngā mema o ngā whānau i whai wāhi mai ki te mahi mō te rā kotahi, me ētehi atu anō i noho mai mō ngā marama, e pānui haere ana i ngā pukapuka mīniti e rapu ana i ngā honohononga ki te iwi, ki ō mātou whenua me ō mātou tūpuna, nā rātou anō ērā kōrero i kōrero, i kōrerohia rānei rātou i ngā kōrero taunaki. Ko te hua i puta mai i te kaupapa, ko te tuhinga o ngā manomano whārangi o ngā mīniti o Te Kōti Whenua Taketake. Ka noho ko ēnei tuhinga kōrero hei tūāpapa mō ngā pūrongo rangahau whānui 16 e pā ana ki te iwi, me te whai wāhitanga o te Karauna, e whakaatu ana i ngā tino takahitanga o te Tiriti a te Karauna.
Ko tētehi haepapa ki a mātou, ko te āta whakamōhio i ngā uri i ngā taumata rerekē o ā mātou kōrero whakawhitiwhiti, nō mātou e kōkiri ana i te whakataunga. Nā konā i tau ai te wāhanga ki ngā whakataunga tika a te iwi. I ahu mai ngā pātai pēnei i waenga i ētehi o ngā uri, ‘He aha ngā painga mōku kei tēnei whakatau, ā, he aha hoki ka hua mai ki a au?’ I te rongotanga o ēnei momo pātai ka tere huri atu mātou ki te hunga ihumanea, ki ō mātou kaumātua ki a Hori Deane rātou ko Jimmy Clair, ko Toiamoko Manaia, ko Haki Thompson, ko Mac Winika, ko Huirama Te Hiko, ko Lorna Pope, ko Kahu Te Hiko, ko Ruthana Begbie me te maha noa atu.
He ngāwari, he mārama hoki tā rātou whakautu. I kī mai rātou, he whānau kotahi tātou, he iwi kotahi, ā, ahakoa kei tēwhea wāhi o te takiwā tātou e noho ana, ka noho taurite te whakataunga ki te katoa. Nā konei, whai haere ai te tīma kia pēnei ‘E kore e riro i tētehi uri, tētehi painga nui atu, iti iho rānei i tētehi atu uri o Raukawa i te whakataunga kerēme.’ I horapa haere nei tēnei aronga huri noa i te iwi, i ngā wāhanga whakamana i te tukanga, ā, koirā te take i purutia ai e mātou ngā rawa whakahoki katoa hei rawa katoa mā te iwi.
